As causas do accidente son descoñecidas. O condutor do vehículo atópase ingresado no hospital.
Por Juan Cao
O suceso tivo lugar o día cinco de abril entre as catro e as cinco da tarde, cando un camión que circulaba pola AC-524, estrada que conecta Ordes con Lanzá, envorcou lateralmente e perdeu parte da súa carga.
O tráiler circulaba en dirección a Lanzá cando, ao chegar a unha curva situada entre os puntos quilométricos seis e sete, á altura do Peñasco, envorcou e quedou apoiado no seu lado dereito, o que provocou a perda de parte dos restos forestais que transportaba.
Ao lugar do accidente desprazáronse efectivos da Garda Civil de Tráfico e do 112. O condutor do vehículo foi trasladado ao hospital, onde se atopa recuperándose das lesións producidas no accidente.
As causas do suceso, polo de agora, son descoñecidas.
